Neni 1

 

 

Lëvizja për Zhvillim Kombëtar, e ideuar dhe e udhëhequr nga trashëgimtari legjitim i fronit mbretëror shqiptar Leka i I, është një levizje popullore perparimtare, jo monarkiste,  në formën e një koalicioni me bazë të gjërë, i partive politike, shoqatave dhe e individëve  të shquar të shoqërisë shqiptare që ka si qëllim të  zhvillojë dhe të transformojnë pozitivisht realitetet politike në dobi të aspiratave shpirtërore, sociale dhe materiale të popullit shqiptar në përputhje me interesin dhe traditën kombëtare duke pranuar dhe respektuar institucionet dhe rregullat e pluralizmit politik.

Misioni kryesor i kësaj lëvizje është krijimi i një klime të re politike, pa prekur pluralizmin dhe shumllojshmerine e pikpamjeve, duke e konsideruar gjëndjen e sotme shkaktare të kaosit, korrupsionit, pasigurisë, varfërisë, dëshpërimit popullor dhe qeverisjes thellësisht antikombëtare. Lëvizja për Zhvillim Kombëtar, beson tek tradita, patriotizmi, dëshira për liri, shpirti demokratik  dhe vitaliteti i popullit shqiptar duke përkrahur nevojën dhe dëshirën objektive të tij për ndryshime thelbësore në drejtim të politikës, ekonomisë, institucioneve bazë të shtetit dhe të së drejtës në rrugë plotësisht demokratike. Lëvizja për Zhvillim Kombëtar aspiron për një Shqipëri të drejtë dhe të begatë për të gjithë, sipas kontributit dhe aftësisë, për një Shqipëri pluraliste të sigurtë dhe ligjore në kushtet e një një ekonomije humane të tregut, për një Shqipëri ku të vlerësohet dhe të garantohet me ligj prona e vjetër dhe e re, për një Shqipëri që shkon me dinjitet drejt një integrimi të përshtatshëm mbarëkombëtar europian.      

 

Antarësija dhe Parimet Organizative

 

Neni 2           

 

Lëvizja për Zhvillim Kombëtar, L.Zh.K, është e hapur për të gjitha partitë politike, shoqatat dhe individët që janë të gatshëm të zbatojnë pa kushte kodin organizativ të  Lëvizjes për Zhvillim Kombëtar dhe gjejnë vënd për integrimin e programit dhe pikpamjeve të tyre brënda programit të Lëvizjes për Zhvillim Kombëtar. Lëvizja për Zhvillim Kombëtar respekton pavarësinë dhe identitetin politik të ç‘do partie apo individi pjesmarrës, duke krijuar në të njëjtën kohë një sistem operativ vlerash organizuese të përbashkëta dhe të detyrueshme për të gjithë.

 

 

Neni 3

Lëvizja për Zhvillim Kombëtar, L.Zh.K, në përputhje me specifikën nominative të krijimit të saj, funksionon mbi bazën e përqëndrimit të përgjegjësive organizative vepruese në duart e Udhëheqësit të Lëvizjes  duke siguruar në të njëjtën kohë funksionimin demokratik pluralist të strukturave dhe garantimin  e shanceve të barabarta për të gjithë.

 

Neni 4

Të gjithë partitë dhe shoqatat pjestare institucionale të   Lëvizjes për Zhvillim Kombëtar i bëjnë thirrje antarësisë së tyre që duke ruajtur antarësimin origjinal, të antarësohen në mënyrë të dyfishtë në Lëvizjen për Zhvillim Kombëtar. Regjistrimi kryhet sipas një formulari “tip”pranë zyrës më të afërt me vëndbanimin e tyre të  “Lëvizjes për Zhvillim Kombëtar” dhe paiset me biletë antarësije. Ç`do antar i  Lëvizjes për Zhvillim Kombëtar ka detyrimin financiar mujor në formën e kuotës së antarësimit për jo më pak se 100 lek.

 

Neni5

Lënia e antarësisë, ashtu si dhe antarësimi është vullnetar.

Nuk konsiderohesh më antar i  Lëvizjes për Zhvillim Kombëtar kur :

-nuk pranon të paguash kuotën financiare të përshkruar në nenin 4 të këtij dokumenti

-dorzon dokumentin e antarësimit në seksionin apo degën e  Lëvizjes për Zhvillim Kombëtar në të cilin je antarësuar

-nuk paraqitesh pa arsye 3 herë rradhazi në aktivitetet e  Lëvizjes për Zhvillim Kombëtar në të cilat je thirrur.

-qëndrimi i mëtejshëm nuk përputhet me qëllimin dhe normat e këtij kodi organizativ

-kur antari vdes

 

 

 

 

 

 

Organet Drejtuese qëndrore

 

Neni 6

Lëvizja për Zhvillim Kombëtar, e zhvillon veprimtarinë e udhëhequr nga organet e saj drejtuese:

a.            Udhëheqësi i Lëvizjes

b.            Kuvëndi i Madh i Lëvizjes për Zhvillim Kombëtar

c.            Këshilli i Lartë Kombëtar Konsultativ

d.            Këshilli i Lartë Kombëtar Ekzekutiv

e.            Kryesija Kombëtare

f.            Sekretariati

g.            Sekretari i përgjithshëm

h.            Këshilli i paqtimit të mosmarrveshjeve parimore

i.            Komisioni ekonomik dhe i kontroll revizionit

j.            Komisioni shkencor i Studimeve Politike

 

Udhëheqësi i Lëvizjes

 

Neni 7

 Udhëheqësi i Lëvizjes është Trashëgimtari legjitim i fronit mbretëror shqiptar Leka i I, ai është funksionari më i lartë i Lëvizjes për Zhvillim Kombëtar dhe vepron i pavarur mbi bazën e përgjegjësive historike të familjes dhe titullit të tij mbretëror. Udhëheqësi i Lëvizjes, si ideator dhe frymëzues i kësaj lëvizje, ka detyrën dhe përgjegjësinë të kontrollojë, të koordinojë dhe të vërë në veprim të gjitha strukturat e  Lëvizjes për Zhvillim Kombëtar. Urdhërat dhe vendimet e Udhëheqësit të Lëvizjes, si parim, janë të detyrueshme për zbatim dhe të pa apelueshme .

 

Neni 8

Kompetencat e Udhëheqësit të Lëvizjes :

 

1.           Zgjedh antarët e Këshillit të Lartë Konsultativ

2.           Përcakton 20 persona antarë të Këshillit të Lartë Kombëtar           Ekzekutiv

3.           Miraton Kryesinë Kombëtare

4.           Emron Sekretarin e Pergjithshem dhe Sekretariatin

5.           Miraton përbërjen e Kryesisë Kombëtare

6.            Mbledh Këshillin e Lartë Kombëtar Ekzekutiv dhe Kuvëndin e madh të      Lëvizjes për Zhvillim Kombëtar                                                  

7.            Kryeson Këshillin e Paqtimit të mosmarrveshjeve parimore.

8.         Zgjedh antarët e Këshillit të Paqtimit të Mosmarrveshjeve Parimore

9.            Miraton përbërjen e Komisionit ekonomik dhe të Kontroll-Revizionit

10.       Zgjedh antarët e Komisionit Shkencor të Studimeve Politike

11.            Vendos për çështjet financiare

12.            Emëron sekretarët e degëve

13.            Cakton 10% të listës  të kandidatëve për deputet dhe  miraton pjesën tjetër

14.            Përcakton listën proporcionale të deputetëve

15.            Miraton aleancat dhe qëndrimet e veçanta strategjike

 

Kuvëndi i Madh i  Lëvizjes për Zhvillim Kombëtar (KM)

 

Neni 9

Kuvendi i Madh i Lëvizjes për Zhvillim Kombëtar, është organi më i lartë vendimarrës i lëvizjes. Ky Kuvënd përbëhet nga jo më pak se 10% i numurit të përgjithshëm të pjestarëve të lëvizjes. Kuvëndi i Madh mblidhet një herë në vit në seancë të zakonshme si dhe përpara dhe pas ç‘do fushate elektorale . Me propozim të Udhëheqësit të Lëvizjes, për probleme të një rëndësije madhore, Kuvëndi i Madh mund të thirret jashtë rradhe

 

Neni 10

Kompetencat e Kuvëndit të madh

1              Analizon punen e te gjitha organeve drejtuese te levizjes dhe nxjerr detyrat per te ardhmen

2.            Miraton strategjinë e fushatave elektorale

3.            miraton strategjinë e funksionimit të  Lëvizjes për Zhvillim Kombëtar pas fushatave elektorale

4.         Zgjedh 100 antarë të Këshillit të Lartë Kombëtar Ekzekutiv.

5.         Me propozim të Udhëheqësit të Lëvizjes, vendos për shkrirjen apo transformimin e  Lëvizjes për Zhvillim Kombëtar

 

 

 

 

Këshilli i Lartë Kombëtar Konsultativ(KLKK)

 

Neni 11

Këshilli i Lartë Kombëtar Konsultativ nuk ka një numur të përcaktuar antarësh, ai është organi i zgjedhur nga Udhëheqësi i Lëvizjes ndërmjet personaliteteve më të shquar të kombit që për shkak të dëshirës apo angazhimeve të tyre specifike nuk mund të marrin pjesë aktive në lëvizje, por pranojnë të kontribuojnë përmes frymëzimit popullor dhe këshillimeve për L.Zh.K. Ky këshill nuk merr vendime, por antarët e tij mund të sugjerojnë dhe të marrin pjesë në të gjitha aktivitetet e  Lëvizjes për Zhvillim Kombëtar dhe janë këshilltarët më të afërt të Udhëheqësit të Lëvizjes. Ky këshill mblidhet saherë që e sheh të nevojshme Udhëheqësi i Lëvizjes duke ju lënë antarëve të tij të drejtën e kontakteve direkte sipas një rendi të përcaktuar në rregulloren e këtij këshilli.

 

Këshilli i Lartë Kombëtar Ekzekutiv (KLKE)

 

Neni  12

Këshilli i Lartë Kombëtar Ekzekutiv përbëhet gjithsej nga 120 antarë, nga të cilët 20 antarë i zgjedh direkt Udhëheqësi i Lëvizjes ndërmjet pjestarëve të kryesive të partive politike, shoqatave pjesmarrëse në lëvizje dhe individëve të shquar apo figurave politike të njohura që janë përfshirë në mënyrë direkte në  Lëvizjen për Zhvillim Kombëtar  dhe 100 antarë të tjerë të zgjedhur në  mënyrë të drejtëpërdrejtë nga mbledhja e forumeve të degëve në rrethe sipas parimit; ç‘do zonë elektorale, një antar në këtë këshill. Pjestarët e këshillit duhet të plotësojnë kriteret e mëposhtëme :

1. Të kenë kaluar personalisht testin ligjor të “pastërtisë së figurës”, apo ta kërkojnë një gjë të tillë në rast se nuk ju është kërkuar më parë.

2. Të mos jetë dënuar për vepra ordinere dhe në ngarkim të tyre të mos ketë asnjë proçes penal për vjedhje, përvetsime apo figura të tjera penale që diskreditojnë figurën morale të pjesmarrësit.

3. Të mos ketë marrë asnjëherë personalisht pjesë në një gjyq si dëshmitar kryesor i akuzës gjatë proçesve politike të kohës së diktaturës.

      

 

 

 

 

 

Neni 13

 

Kompetencat e Këshillit të Lartë Ekzekutiv të lëvizjes janë :

 

1.         Zgjedh Kryesinë Kombëtare

2.            Miraton 90% të listës së kadidatëve për deputet.

3.         Me propozim të Udhëheqësit të Lëvizjes miraton listën e ministrave dhe funksionarëve të tjerë të lartë kushtetues.

4.            Miraton raportin e komisionit të kontroll-revizionit financiar

5.         Zgjedh antarët e Komisionit të Ekonomisë dhe të Kontroll Revizionit dhe ja paraqet për miratim Udhëheqësit të Lëvizjes

6.         Vë në zbatim çështje të tjera të ngarkuara nga mbledhja e Kuvëndit të Madh të Lëvizjes   

Udhëheqësi i Lëvizjes ka të drejtë që deri në masën  10% të emrave të zgjedhura nga Këshilli i Lartë Kombëtar Ekzekutiv ti zëvëndësojë pa kërkuar rishqyrtimin e tyre në mbledhjen e këtij forumi, në raste të tjera kur Udhëheqësi i Lëvizjes nuk është dakord për më shumë se 10% e të zgjedhurve, ai kërkon rimbledhjen e Këshillit të Lartë Kombëtar Ekzekutiv për këtë qëllim

 

Kryesija kombëtare (KK)

 

Neni 14

Kryesija kombëtare përbëhet nga 21 antarë. Kryesija Kombëtare zgjidhet nga Këshilli Kombëtar Ekzekutiv ndermjet perfaqsuesve me te spikatur te partive, shoqatave dhe individeve pjesmarres dhe miratohet nga Udhëheqësi i Lëvizjes. Kryesija Kombëtare  është organi kolegjial politik ekzekutiv më i lartë i L.Zh.K  ndërmjet dy mbledhjeve të Këshillit Kombëtar Ekzekutiv. Kryesija mblidhet ç‘do muaj në një datë të caktuar nën kryesimin dhe inisiativën e Udhëheqësit të Lëvizjes.Në raste të veçanta Udhëheqësi i Lëvizjes autorizon sekretarin e përgjithshëm të thërresi dhe të kryesojë mbledhjen e Kryesisë Kombëtare.

 

 

Neni 15

Kompetencat e Kryesisë Kombëtare

- Ndjek problemet dhe detyrat e lëna nga Këshilli i Lartë Kombëtar Ekzekutiv

- Ndjek dhe kontrollon probleme të veçanta të ngarkuara nga Udhëheqësi i Lëvizjes

- Ndjek dhe kontrollon e punën e organeve të  Lëvizjes për Zhvillim Kombëtar në degë dhe seksione

- Cakton detyrat dhe ndjek punën e sekretariatit

- Merr masa dhe përgatit mbledhjen e Kuvëndit të Madh  dhe Këshillit Kombëtar Ekzekutiv të  të Lëvizjes për Zhvillim Kombëtar

 

Sekretariati

 

Neni 16

Sekretariatit është organ qëndror ekzekutiv i përbërë  nga 5 sekretarë funksionarë të lëvizjes:

- sekretari për çështjet e politikës dhe sigurisë kombëtare

- sekretari për çështjet elektorale

- sekretari për çështjet organizative dhe ekonomike

- sekretari për mas media-n dhe komunikimin me publikun

- sekretari për mardhëniet ndërkombëtare

 

Detyrat e secilit nga sekretarët përshkruhen në një rregullore të veçantë të miratuar nga Udhëheqësi i Lëvizjes. Kompetencat e sekretariatit në tërësi janë të lidhura drejtpërdrejt me kompetencat e secilit sekretar dhe ato të sekretarit të përgjithshëm.

 

 

 

 

 

Sekretari i përgjithshëm

 

Neni 17

Sekretari i përgjithshëm është funksionari më i lartë i lëvizjes pas Udhëheqësit të Lëvizjes. Sekretari i përgjithshëm zgjidhet direkt nga Udhëheqësi i Lëvizjes dhe zbaton urdhërat dhe porositë e tij, duke

kontrolluar punën dhe veprimtarinë politike në emër të  Lëvizjes për Zhvillim Kombëtar të të gjithë sekretarëve dhe të të gjithë funksionarëve të tjerë të emëruar apo të zgjedhur të saj. Sekretari i përgjithshëm nuk është antar i kryesisë, por merr pjesë në mbledhjet e saj dhe sipas dëshirës dhe mundësisë në të gjitha mbledhjet e organeve dhe forumeve të  Lëvizjes për Zhvillim Kombëtar, për veprimet ose mos veprimet e tij jep llogari vetëm përpara Udhëheqësit të Lëvizjes.

 

Komisioni i Paqtimit të Mosmarrveshjeve Parimore (KPMP)

 

Neni18

Komisioni i Paqtimit të Mosmarrveshjeve Parimore përbëhet nga 5 persona të zgjedhur nga Këshilli Kombëtar Ekzekutiv dhe të miratuar nga Udhëheqësi i Lëvizjes. Detyra e këtij komisioni, i cili mblidhet sa herë që dalin probleme të mosmarrveshjeve parimore dhe programore ndërmjet pjesmarrësve në Lëvizje, qëndron në sheshimin dhe kapërximin e këtyre pengesave kur kjo gjë është e mundur. Komisioni i Paqtimit të Mosmarrveshjeve Parimore thirret dhe kryesohet nga Udhëheqësi i Lëvizjes ose nga një person tjetër me urdhër dhe autorizim të këtij të fundit.

 

Komisioni i Ekonomisë dhe Kontroll-Revizionit (KEKR)

 

Neni19

 

Komisioni i Ekonomisë dhe i Kontroll-Revizionit përbëhet nga 5 persona. Ky komision zgjidhet nga Këshilli i Lartë Kombëtar Ekzekutiv dhe ka për detyrë të promovojë mbi bazën e ligjit rritjen e fuqisë ekonomike dhe financiare të lëvizjes dhe të kontrollojë të ardhurat dhe shpenzimet e mundëshme mbi bazën e një disipline financiare të rreptë duke përmbushur në këtë rast edhe kërkesat e ligjit mbi mbajtjen e kontabilitetit. Ky komision përgatit raportin e veprimtarisë vjetore dhe

ja paraqet mbledhjes së rradhës të Këshillit të Lartë Kombëtar Ekzekutiv për miratim.

 

 

 

Komisioni Shkencor i Studimeve Politike (KShSP)

 

Neni20

Komisioni Shkencor i Studimeve Politike pqërbëhet nga 11 persona. Ky komision zgjidhet nga rradhët e kapaciteteve politike shqiptare dhe ka për mision të përpunojë politika dhe strategji në ndihmë të realizimit të qëllimit politik të  Lëvizjes për Zhvillim Kombëtar. Ky komision zgjidhet nga Këshilli i Lartë Kombëtar Ekzekutiv, miratohet nga Udhëheqësi i Lëvizjes dhe kryesohet nga njëri nga antarët e tij i zgjedhur me votën e pjestarëve të tjerë të këtij komisioni.

 

Organet Drejtuese Lokale

Neni 21

Emërtimi i njësive organizative të LZhK, mbi bazën e shtrirjes territoriale, janë

-dega

-N/dega

-seksioni

 

Neni 22

-Degë të LZhK do të ketë në qëndrën e ç‘do rrethi i përcaktuar si i tillë nga  ligji për ndarjen territoriale në Republikën e Shqipërisë.Numuri i antarëve të një dege nuk mund të jetë më i vogël se 50 persona 

-N/degë të LZhK do të ketë në ç‘do njësi të pushtetit lokal, bashki, komunë dhe lagje për qytetin e Tiranës e caktuar si e tillë sipas ligjit në Republikën e Shqipërisë. Numuri i antarëve të një n/dege nuk mund të jetë më i vogël se 20 persona.

-Seksion të LZhK do të ketë në çdo qendër votimi duke u nisur nga zgjedhjet e fundit, numuri më i vogël i antarëve të një seksioni nuk mund të jetë më i vogël se 4 persona.

 

Neni23

Organet drejtuese në degë do të jenë :

1.            Mbledhja e përgjithshme e antarëve të degës

2.            Kryesija e Degës

3.      Sekretari i degës

4.      Mbledhja e përgjithëshme e n/degës

5.     Kryesija e n/degës

6.            Përgjegjësi i Seksionit

 

Neni24

Mbledhja e përgjithëshme e antarësisë të Degës së LZhK, është forumi më i lartë vendimarrës në degë. Mbledhja e përgjithëshme e antarësisë thirret përpara dhe pas ç‘do fushate elektorale dhe ka përgjithësisht këto  kompetenca :

1.   Zgjedh Kryesinë e degës

2.            Cakton delegatët në Kuvëndin e Madh të Lëvizjes për Zhvillim Kombëtar

3.            Propozon në përputhje përfaqsuesit e degës në Këshillin e Lartë Kombëtar Ekzekutiv

4.            Propozon K.L.Kombëtar Ekzekutiv emrat për deputetë në zonat elektorale brënda territorit të degës

5.            Analizon punën e bërë nga n/degët dhe seksionet, para dhe pas ç‘do fushate elektorale

 

Neni25

Kryesija e Degës, është organi më i lartë ekzekutiv i degës ndërmjet dy mbledhjeve të përgjithëshme të antarësisë. Kryesija e degës përbëhet, sipas rastit, nga 11 deri në 19 antarë. Numri i antarëve të kryesisë ndryshon në përputhje me numurin e grupimeve pjestarë institucionalë të Lëvizjes dhe ekzistencën e figurave shumë të njohura të jetës publike dhe politike që kanë aderuar në LZhK. Kryesija mblidhet 2 herë në muaj dhe në fillim të ç‘do mbledhje zgjedh presidiumin e mbledhjes prej tre antarësh të cilët të cilët zgjidhen me rotacion. Vendimet në Kryesi merren me konsensus, në rastet kur kemi dështime të vendimarrjes, sekretari i degës, ja referon çështjen për zgjidhje Kryesisë Kombëtare.

 

Neni 26

1.Organizon dhe bashkërendon punën elektorale dhe politike të pjestarëve të lidhjes në raste fushatash

2.analizon gjëndjen politike në rreth, dërgon informacion të përpunuar në qendër dhe merr masat përkatëse në favor të Lëvizjes për Zhvillim Kombëtar dhe kompaktësimit të veprimeve të komponentëve politikë të saj

3.Organizon dhe kordinon punën e këshilltarëve lokalë

4.I propozon Mbledhjes së Përgjithëshme të Antarësisë emrat e këshilltarëve Lokalë në raste fushatash për pushtetin lokal.

5.Miraton kryesinë e n/degës

6.Miraton Përgjegjësit e seksioneve

7.Merr në shqyrtim dhe ndjek probleme të ndryshme të lëna detyrë nga Mbledhja e Përgjithëshme e Antarësisë.

Neni 27

Sekretari i Degës është përgjegjësi organizativo - administrativ i degës që zgjidhet direkt nga Udhëheqësi i Lëvizjes. Sekretari i degës përgjigjet përpara Sekretarit të Përgjithshëm të Lëvizjes për të gjitha parregullsitë dhe shkeljet e statutit që ndodhin në të gjthe degën. Në raste të veçanta, në kushtet e shkeljeve flagrante të rregullave organizative dhe administrative nga ana e personave të veçantë ose forumeve në degë, sekretari i degës duhet të urdhërojë ndërprerjen e aktivitetit dhe menjëherë të lajmërojë sekretarin përkatës. Në raste përsëritje, sekretari i degës njofton direkt Sekretarin e Përgjithshëm ose edhe vetë Udhëheqësin e Lëvizjes duke e gjykuar nga rëndësia e pasojave të shkeljes. Sekretari i Degës nuk është antar i Kryesisë së Degës, por ka të drejtë të marri pjesë në të gjitha aktivitetet e organizuara brënda juridiksionit të degës përkatëse.

 

Neni28

Mbledhja e përgjithëshme e N/degës dhe Kryesia e N/Degës organizohen në modelin e Kryesisë së degës duke i‘u referuar juridiksionit të tyre territorial të përcaktuar më lartë në këtë dokument.

 

Dispozita të fundit

Neni 29

Grupi parlamentar

Grupi parlamentar është përfaqsimi më i rëndësishëm institucional i LZhK. Ç‘do deputet ka të drejtë të marrë pjesë në të gjitha mbledhjet e Forumeve të Larta të LZhK edhe pa qënë i zgjedhur. Nëpërmjet Grupit të saj Parlamentar LZhK, në opozitë apo në pushtet, përcjell në Parlament idetë dhe programin e saj politik për transformimin e vëndit dhe përmirësimin e qeverisjes. Të gjithë deputetët e zgjedhur drejtëpërdrejt ose nëpërmjet listës proporcionale në emër të LZhK, janë të detyruar të mbajnë qëndrimin e të gjithë grupit në interes të programit dhe qëndrimit te saj politik , në të kundërt Deputetët të cilët nuk veprojnë në përputhje me programin dhe qëndrimin politik të grupit të LZhK, konsiderohen jashtë grupit dhe lihen të lirë të zgjedhin rrugën e tyre politike përfaqsuese mbi bazën e ligjit dhe rregullores së brëndëshme të Parlamentit.

Neni 30

Të gjithë antarët e LZhK dhe simpatizantët e saj nën moshën 30 vjeç janë pjestarë, sipas dëshirës, të “Forumit Rinor Patriotik” . Forumi Rinor i LZhK ka  programin dhe synimin e tij politik njëkohësisht ky forum ka rregulloren dhe formën e vet të funksionimit.

 

Neni 31

Të gjitha antaret dhe simpatizantet femra të LZhK, sipas dëshirës, formojnë “Forumin e Gruas Patriote”. Forumi i Gruas Patriote, ashtu si dhe Forumi Rinor Patriotik, vepron mbi bazën e programit dhe rregullave të tij të veçanta.

Neni 32

LZhK është një lëvizje transparente dhe qëndron e hapur në drejtim të  shpenzimeve dhe të ardhurave të saj financiare. Të ardhurat financiare te LZhK mund të sigurohen  vetem nepermjet:

1.kuotizacionit të antarsisë

2.financimeve buxhetore

3.Dhuratave, sposorizimeve dhe të ardhurave të tjera te siguruara në përputhje me ligjin shqiptar për këtë qëllim.

Neni 33

Ky kod organizativ është i përkohshëm dhe subjekt i ndryshimeve nga ana e Udhëheqësit të Lëvizjes, pa paralajmërim, sa herë që del e nevojshme një gjë e tillë për shkak të përsosjes dhe përshtatjes së tij me ndryshimet në strategjinë e përgjithshme të LZhK.

 

Fund